Një 31-vjeçar i shpallur në kërkim, i cili qarkullonte me armë në zonën e Zerqanit, të njësisë administrative Zerqan, Bulqizë, është arrestuar.
Sipas burimeve policore, në pranga është vënë Besmir Sula, i cili është me precedent kriminal në fushën e kultivimit dhe trafikimit të lëndëve narkotike, si dhe krimeve ndaj personit. Gjatë arrestimit, me makinën me të cilën lëvizte, ai ka përplasur automjetin e Policisë.
Aksioni
Policia njofton se: Në zbatim të Planit Operacional “Vjeshtë 2017”, për kapjen e personave në kërkim, të atyre që qarkullojnë me armë zjarri, apo që janë kthyer në shqetësim për komunitetin, nisur edhe nga shqetësimet e banorëve të zonës së Zerqanit, Bulqizë se një shtetas qarkullon me armë dhe është kthyer në shqetësim për banorët, efektivat e Komisariatit të Policisë Bulqizë, në bashkëpunim me strukturat e Drejtorisë Vendore të Policisë Dibër, kanë organizuar dhe finalizuar operacionin policor të koduar “Zerqani”.
Bazuar edhe mbi informacionet e marra në rrugë operative se shtetasi Besmir Sula (Zeneli), 31 vjeç, banues në Tiranë, po qarkullonte me një automjet “Land Rover”, me targa false, Tr 95 65 P, në dalje të qytetit Bulqizë , në zonën e quajtur ‘Pishat’, kanë bërë të mundur bllokimin e automjetit me të cilin udhëtonte ky shtetas si dhe kapjen e arrestimin e tij.
Në momentin që ka parë forcat e policisë, 31-vjeçari i ka dhënë gaz duke tentuar të largohet dhe me makinën që lëvizte ka goditur makinën e Policisë, duke vënë në rrezik jetën e efektivëve.
Gjatë kontrollit të automjetit janë gjetur 10 fishek pistolete.
Shtetasi Besmir Sula (Zeneli), qëndronte i fshehur në një banesë të gjyshes së tij, në Zerqan, dhe në bazë të informacioneve policore kishte aksione në një fabrikë të pasurimit të kromit në Ternovë të njësisë adminsitrative Zerqan, Bulqizë.
I shpallur në kërkim
Ky person ishte i shpallur në kërkim nga Drejtoria Vendore e Policisë Tiranë për “Vrasje me paramendim mbetur në tentativë” e “Prodhim dhe mbajtje pa leje të armëve luftarake”.
Më datë 06.05.2017, Besmir Sula (Zeneli), shpallet në kërkim, pasi me datë 04.05.2017 në Rrugën “Kongresi i Manastirit”, është plagosur me armë zjarri shtetasi D.R.. Nga veprimet e para hetimore ka rezultuar se autor i dyshuar i kësaj ngjarjeje është shtetasi Besmir Sula (Zeneli).
Shtetasi i lartpërmendur do ti dorëzohet Drejtorisë Vendore të Policisë Tiranë për veprime të mëtejshme, ku krahas veprave për të cilat është shpallur në kërkim do të procedohet edhe për kundërshtim me dhunë të forcave të policisë si dhe mbajtja pa leje e armëve dhe municioneve luftarake, njofton Policia.
