Dhjetëra kallëzime penale janë depozituar në SPAK gjatë dy muajve të fundit nga subjekte politike, institucione dhe qytetarë për vepra penale në fushën e zgjedhjeve, për të cilat janë gjetur elementë për të filluar hetimin në 32 raste.
Prokuroria e Posaçme kundër Korrupsionit dhe Krimit të Organizuar, SPAK njoftoi të premten se për periudhën mars-prill 2021 janë depozituar gjithsej 91 kallëzime penale që lidhen me veprat penale në fushën e zgjedhjeve, prej nga ka regjistruar 32 procedime penale.
Në njoftimin e SPAK thuhet se kallëzimet janë referuar për veprat penale “Korrupsioni aktiv në zgjedhje” dhe “Korrupsioni pasiv në zgjedhje”, apo ndaj subjekteve të ndryshëm, që janë kompetencë hetimi e kësaj prokurorie.
Pjesë më e madhe e kallëzimeve është kryer nga Partia Demokratike në 50 raste, tre kallëzime nga Lëvizja Socialiste për Integrim, 1 nga Partia Socialiste dhe 1 nga FRD.
Ndërkohë, janë denoncuar 18 raste nga institucioni i Presidentit të Republikës, 10 kallëzime janë referuar nga policia gjyqësore, 4 çështje janë transferuar nga prokuroritë e rretheve dhe 4 denoncime janë kryer nga qytetarë të ndryshëm.
SPAK bënë me dije se janë regjistruar procedime penale për 32 prej kallëzimeve; ka vendosur mosfillimin për 7 raste; janë deleguar në polici për verifikime të mëtejshme 15 raste; 23 kallëzime janë dërguar në prokuroritë e rretheve gjyqësore dhe 14 të tjera janë duke u verifikuar ende prej prokurorëve.
