Një ngjarje e rëndë ka ndodhur këtë mbrëmje në Dibër, ku gazetari i News 24, Enver Doçi është goditur nga forcat RENEA në qendër të qytetit. Doçi ka qenë duke xhiruar me telefon një operacion për arrestimin e disa personave në pedonale të qytetit, teksa një efektiv i RENEA-s e ka goditur me tytën e armës në këmbë dhe në krah.
Lidhur me këtë ngjarje ka reaguar edhe Policia e Shtetit, ku në një njoftim shpërndarë për mediat, bën me dije se Forcat e Ndërhyrjes së Shpejtë ishin në një operacion me risk dhe janë treguar të pakujdesshëm, duke shtyrë gazetarin teksa po filmonte me celular.
“Ky akt i pakëndshëm erdhi si rezultat i aksionit të zhvilluar nën tension dhe pamundësisë së punonjësit të Policisë për të identifikuar në kohë të shpejtë gazetarin”, shkruan policia në deklaratë.
Lidhur me ngjarjen ku u dhunua gazetari i News 24, Enver Doçi ka reaguar edhe ish-deputeti i Partisë Demokratike Xhemal Gjunkshi, duke deklaruar se gazetari u dhunua teksa filmonte skenën që terrorizoi qindra qytetarë, gra e fëmijë.
Që prej mbrëmjes së të shtunës ku protestues të opozitës u përplasën me policinë në KZAZ-në numër 19, në Dibër kanë mbërritur një grup i Forcave të Ndërhyrjes së Shpejtë.
/bulqizaime.al/
