Në një vend normal, sindikatat janë kundër pushtetit dhe shkeljes së të drejtave të njeriut sepse mbrojnë interesat e punëtorëve. Por në Shqipëri ndodh krejt e kundërta, sindikatat dhe pushteti janë në një tavolinë. Kol Nikollaj, President i Konfederatës së Sindikatave të Shqipërisë shfaqet i buzëqeshur në punimet e Kongresit të Partisë Socialiste që u mbajt më 23 mars. Foto postuar nga fotografi i Kuvendit të Shqipërisë, Agim Rama ka nxitur shumë diskutime në rrjetet sociale, për rolin inekzistent të sindikatave në mbrojtjen e të drejtave të punëtorëve dhe uljen në tavolinën e pushtetit në ‘kurriz të punëtorëve’.
Pas kritikave të shumta, ka reaguar edhe Nikollaj për foton nga Kongresi i Partisë Socialiste, duke e konsideruar rolin e sindikatave si partnere me politikbërjen dhe vendimmarrjen, me shoqërinë civile dhe me partitë politike.
“Sindikatat janë organizata shoqërore që ushtrojnë veprimtari publike. Ato vërtetë janë opozitare me çdo qeverisje dhe organizata punëdhënësish; janë të pavarura politikisht dhe ekonomikisht, por janë partnere me politikbërjen dhe vendimmarrjen, me shoqërinë civile dhe me partitë politike, komunitetet fetare e grupe të tjera interesi të organizuara demokratikisht. Edhe në kongresin e PS ishim të ftuar dhe në përmbushje të plotë të statutit të KSSH-së e në përmbushje të plotë të vullnetit e të interesave social-ekonomike të antarsisë sonë”, shkruan Nikollaj në reagimin për foton në fjalë.
Për minatorët e Bulqizës, në deklarimet publike të bëra për mediat, faji kryesor për mosmiratimin e statusit të “Minatorit” është i sindikatave të minatorëve. Minatorët e qytetit të minatorëve, thonë se pas grevës së urisë të zhvilluar pak vite më parë, as Konfederata e Sindikatave e as sindikatat e tjera, nuk kanë bërë asgjë për ta, por përkundrazi sipas tyre, ato janë bërë palë me politikën, duke lënë në mëshirë të fatit shtresën e minatorëve. Një nga zërat më kritik ndaj rolit të sindikatave për minatorët e Bulqizës ka qenë ish-minatori Dilaver Përkoxha që më pas u shkarkua nga puna në kompaninë ACR. Dy minatorë të tjerë të kompanisë koncensionare ACR në Bulqizë, Bajram Duka dhe Ferat Kurti u shkarkuan nga puna afro dy vite më parë, pasi bashkë me minatorë të tjerë, kanë zhvilluar një protestë, ku kërkonin vjetërsinë në punë, statusin e minatorit dhe rritjen e pagës.
