Shtabi i Emergjencave Civile ka bërë të ditur se në të gjithë Shqipërinë janë aktualisht 13 vatra zjarri aktive.
Përsa i përket Dibrës, sipas njoftimit shpërndarë për mediat, Emergjencat Civile bën me dije se në fshatin Muhurr, është rindezur zjarri në një sipërfaqe pyjore me pisha, duke rrezikuar banesat dhe varrezat e fshatit. Shërbimi zjarrfikës ka ndërhyrë, por e ka pasur të pamundur të shuajë flakët për shkak të terrenit malor, ku është ndërhyrë me anë të helikopterit i cili ka shuar flakët.
Por në raportimin e Emergjencave Civile në asnjë rresht nuk përmendet Bulqiza, që prej ditësh janë disa vatra aktive zjarri në pyjet e kësaj zone. Këto vatra nga Emergjencat Civile nuk raportohen, duke manipuluar opinionin publik në lidhje me numrin e vatrave të zjarrit.
Aktualisht në zonën e Bulqizës ka disa vatra zjarri:
Nga Krasta, zjarri ka përfshirë edhe masivin me pisha sipër zonës mineralmbajtëse D, vatër e cila ka disa ditë që është aktive.
Aktive është edhe vatra në Liqenin e Zi, që është rindezur. Gjithashtu edhe në masivin pyjor Sheshe Bulqizë, në njësinë administrative Fushë – Bulqizë është një vatër zjarri.
Tymi ka mbuluar të gjithë luginën, ndotje që ka shkaktuar komplikacione shëndetësore tek personat që kanë probleme me rrugët e frymarrjes.
Por edhe pse me një situatë të tillë, Emergjencat Civile nuk kanë ndërhyrë asnjëherë nga ajri për vënin nën kontroll të këtyre vatrave të zjarrit.
/bulqizaime.al/
